Monday, December 22, 2014
   
Text Size

Deursoek Webwerf (Search)

Blog

Swiegers by Steak 'n Ale, Oefen, Oefen, Oefen

(0 votes)

André Swiegers by Steak ‘n Ale

 

Gisteraand (Vrydagaand) het ek en my Susanna gaan kuier by Steak ‘n Ale om André Swiegers te gaan luister. Die laaste keer toe ek by ‘n show van André bygewoon het was toe ek nog in Doebai gewoon het – in 2007.

 

Soos gewoonlik was Charlene van Steaks weer die perfekte gasvrou en het moeite gedoen om by elkeen van haar gaste uit te kom. Die fenomeen van Steak ’n Ale is miskien ‘n voorbeeld vir al die nuwe venues wat probeer om oop te maak en te oorleef. Daar is baie redes waarom Steak ’n Ale nog steeds aan die gang is na al die jare. Charlene en haar gasvryheid wat elke gas spesiaal laat voel is een. Nog ’n komponent is die musikante wat daar optree. Daar is altyd ’n mengsel van ou en nuwe talent. Gaan kyk op hul webblad – Anton Goosen, Brenda Burnit, André Swiegers, Silver Creek, Mel Bothes, - jy kan aangaan en jy syl sien dat dit is almal musikante. Mense wat live musiek  met regte musikante maak. Jy kan enige aand gaan wanneer daar live musiek is, en jy sal jouself geniet. Dan die mense wat daarnatoe gaan. Die mense is musiekliefhebbers. Hulle waardeer, applous, en raak betrokke by dit wat op die verhoog aangaan. En dit bly altyd, altyd ‘n persoonlike ervaring. Steak ‘n Ale in Bothalaan Centurion is in kort een van my gunstelik plekke om te wees. En Charlene betaal my nie om dit te sê nie.

 

Toe ons aangekom het by die venue het ons vriende van ons raakgeloop – Rilette Meyer is ‘n vryskut joernaliste wat die eerste artikel oor my met my terugkeer geskryf het in manwees. Ons het sommer dadelik gekliek en loop mekaar gereeld raak by musiekgeleenthede. André het so net voor 9 opgegaan en saam met sy twee seuns – Jean en Emile opgetree. Jean speel die dromme deesdae en Emile kitaar. Die vertoning was intiem en voortreflik met André se skertsende  humor tussen van sy treffers en minder bekende songs deur. Hy trek die gehoor in sy musiek in met staaltjies oor die agtergrond van liedjies (gewoonlik met een of ander vrou erens betrokke), en lewer dan die vertoning wat ons aan sy lippe laat hang – nie deur deur die pretensieues weg te volg nie, maar deur intelligente musiek (hier leef meer as drie akkoorde) met skerp lirieke wat erens aanklank het met hoe ek dink. Ek beskou André as een van ons vooraanstaande musikale vakmanne, en ek voel (soos met ander van ons top musikante) dat hy nie die erkenning kry wat hy verdien nie.

 

Ons het uiteindelik so teen 12-uur weggekom by Steaks en beide Susan en ek het onself geniet en definitief gevoel dat elke oomblik van die aand spesiaal was. Dankie Charlene van Steak ’n Ale dat jy top musikante die platform gee om gehoor te word en dankie André dat jy jou talent met ons kom deel het.

 

Oefening, oefening

Dinsdagaand speel ek saam met Murg by die Battle of the Bands. Ons het Donderdag gerepeteer en weer vanoggend – van 9-uur tot 1-uur vanmiddag. Ons hoef net drie liedjies te speel in die eerste rondte, maar ons voel tog dat ons dit goed ingeoefen wil wees. Die liedjies wat ons gaan speel is drie van my nuwe liedjies – „Konings Kantel“, „Arbeie en Room“ en „Ek is hier om te bly“. Ek hoop hulle is reg vir ons styl daar by die kompetisie. Hou vir ons duime vas en as julle in die omgewing is, kom ondersteun ons asseblief.

 

More is Sondag, en ons gaan net rus. Dit is in elk geval die plan. Daar is so veel om te doen, maar ons sal kyk wat daarvan sal gedoen kan word sonder om ons Sabbatsrus te erg te versteur.

 

En Rugby

 

Ek het vanmiddag saam met my keyboardspeler - Jacques Sutton (ook bekend as Slangvel Sutton) en sy familie en vriende rugby gekyk. Rugby is ' pragtige sport wat ek met entoesiasme volg, en dit was wel koning-rugby wat opgedis was in die wedstryd tussen die Bulls en die Crusaders. Veels geluk aan die Bulls en hul ondersteuners met hul plek in die final!

 

Tot Kyk

 

-Gideon-

 

Radio Platorand, Tswane - die Heilige koei, Die twee Zuma's

(0 votes)

Radio Patorand onderhoud 

Gister was interessant. Baie interessant. Ek was gister by ‘n Studio in Silverton waar hulle die onderhoud met Rea (met ‘n e le Roux vir Radio Platorand) opgeneem het. Dit was vinnig en effektief in die kassie en sal as Radio Platorand se Ster van die Week uitgesaai word. Ons weet nie wanneer dit sal uitgesaai word nie, maar dit is ’n mooi onderhoud (volgens my). Ek sal julle op hoogte hou met die uitsaaidatums.

 

Vanmore kry ek toe uiteindelik weer kans om ’n bietjie te koerant, en o wee – dit is maar die normale ding vir ’n weeksdag by News24.

 

Die Heilige Koei vra duur vir haar melk

Eerste „goeie“ nuus vir die dag is dat krag in die ewig-ontwykende Tswane (vir die naamveranderende burgermeester in elk geval) gaan opgaan met meer as 30%. http://jv.news24.com/Beeld/Suid-Afrika/0,,3-975_2520527,00.html Net om almal nog gelukkiger te maak om in die land van die heilige koei te woon, gaan eiendomsbelasting, water en sanitasie-dienste met 13% styg en Vullisverwydering met 17%. Ek weet nie of dit net ek is nie, maar vir ’n regering wat probeer voorgee dat hulle omgee vir hul kiesers, lyk dit vir my ’n erg verdagte ding om te doen. Of miskien is dit ’n manier om al julle Pretorianers te straf wat nie vir die ANC gestem het in die vorige verkiesing nie? Ek sien dat dit nou die manier is wat besigheid gedoen word. Die ANC is glo ook nou besig om die DA te straf vir „beledigende“ opmerkings oor onse Prez.   http://www.news24.com/News24/South_Africa/Politics/0,,2-7-12_2520386,00.html . As straf vir Zille se uitlating dat Jacob Zuma sy vrouens blootstel aan moontlike besmetting met VIGS as gevolg van sy klaa rblyklike voorliefde vir wyfies met VIGS en daarmeegepaardgaande kreatiewe voorkomingsmaatreels. Dit smaak my dat robuuste politiek net goed is wanneer dit bedryf word deur ons almal se gunsteling jeugleier.

 

 Dudu se paartie

Gepraat van Sy Edele die Prez-till-Jesus-comes – ek sien dat sy dogter-uit-een-van-sy-sewe-huwelike, Duduzile Zuma so hard gewerk het aan pappie se verkiesingsveldtog dat sy ‘n lekker verjaardagpaartie gehou het. ‘n Verjaardagpaartie van so R 400 000. http://jv.news24.com/Beeld/Suid-Afrika/0,,3-975_2520492,00.html – die heersende Lord of the Flies, Julius was ook daar – met nog 600 van h aar beste vriende. Een van my persoonlike gunstelinge vir so ‘n eerste-generasie-na-bevryding soiree moet sekerlik José Eduardo dos Santos ( die president van daardie ander vrug van die rewolusie – Angola) se dogter, Malva. Lank lewe die rewolusie! Geregtigheid en gelykheid vir almal! Duduzile is natuurlik ‘n “sakevrou” en dit is waarom sy ‘n soiree kan hou vir 600 mense. Misterieus genoeg kan die organiseerder nie vertel wie daarvoor betaal het nie. Terloops – dit is dieselfde Duduzile wie se getuienis in die hof deurslag gegee het tot Meneer Prez se vryspraak vir die verkragtingsaak so ’n paar jaar gelede. Ek wonner nou maar net. Hoe is dit dat die arme bloedjie so uitgeput was na pappie se verkiesing as ’n sakevrou beskryf kan word. As jy maande lank verkiesingsdinge doen is daar mos nie tyd vir sake nie?  ‚n Bietjie Google (ai wat het ons voor Google gedoen) noem dat sy gedurende Zuma se verkragtingsverhoor vir MTN gewerk het, en al wat ek op hierdie stadium op kort kennisgewing kan uitvind, is dat sy in alle berigte as ’n besigheidsvrou gelys word en gereeld vir onse Prez vergesel na amptelike funksies. Weet enige van julle watse besigheidsvrou die Eerste Dogter is? Laat my weet asseblief!

 

 

Vanaand gaan ons Andre Swiegers se show kyk by Steak 'n Ale. Sien julle daar!!

 

Tot Kyk

 

-Gideon-

   

Terug van Weggewees, Rea le Roux, Swiegers en Battle of the Bands

(0 votes)

Besigheid soos normaal

 

Ek begin nou weer in die ritme van my normale lewe in te kom. DIt is moeilik, maar nie omdat ek nie van my lewe hou soos hy is nie. Dit is moeilik omdat as mens se ritme versteur is, jy so ‘n bietjie sukkel om jou ewewig weer terug te kry.

 

Liedjieboer

Dus – terug na normale dinge. Vanaand gaan ons weer Liedjieboer toe vir ons normale Woensdagaand gig. Ek rek die definisie van Normaal miskien so ‘n bietjie, omdat ek ‘n maand laas daar gegig het. Niks vreemds nie, maar met al die April versteurings in programme as gevolg van oudig nie reelmaat aan Woensdagaande by die Liedjieboer nie.

 

Onderhoud met Rea le Roux

Donderdag gaan ek ’n draai maak in ’n studio in Pretoria waar ons ’n opname gaan maak vir Radio Platorand se Ster van die Week. Dit is ’n advertensie in onderhoud formaat wat dan uitgesaai word oor Radio Platorand. Dan speel hulle ‘n paar van my liedjies en ons gesels oor alles waarmee ons besig is op die oomblik. Die onderhoudvoerder is Rea le Roux, en ek dink dit gaan nogal pret wees. Die dilemma vir my is dat ek sort van by verskeie kruispaaie in my loopbaan staan, en nie regtig weet waaroor ons in die kort tydjie kan gesels nie. Murg is nou al ’n jaar lank beskikbaar, maar dit is nie regtig wat ek op die oomblik doen nie. Moet my nie verkeerd verstaan nie – ek skryf nog songs, maar die hele solo ding is nie so veel van ’n fokus vir my op die oomblik nie. Ek geniet dit miskien te veel om ’n deel van ander groot goed te wees. Daar is die akoestiese stelle wat ek saam met David doen wat ek vreeslik baie geniet, daar is die hele ding met Murg wat volgens my groot gaan gaan, en dan is daar al my ander konsepte waaraan ons tussendeur dink en soms ook werk soos die Naak konsepalbum, die Chris de Burgh tribute show wat nog van die grond af moet kom. Dan is daar die opwindende dinge wat ons doen met fotografie – dus daar is te veel om oor te praat. Ek sal julle meer laat weet oor die onderhoud en wanneer dit lugtyd gaan kry en so aan na die onderhoud.

 

 

Swiegers by Steak 'n Ale

Vrydagaand gaan ek vir Andre Swiegers ondersteun by Steak ’n Ale. Ek gaan dit nie net doen omdat ek ‘n groot fan van sy musiek is nie, maar ook omdat ek dink dat ons as musikante ons goeie liedjieskrywers nie genoeg ondersteun nie. Ook ons Afrikaanse gehoor waardeer ons goeie skrywers nie genoeg nie. Ek wil dus vir julle almal ’n uitdaging stuur hiermee. Probeer om elke maand minstens een goeie skrywer se show by te woon. Daarby bedoel ek nie net een goeie entertainer soos Kurt Darren nie, maar net een skrywer van sielsmusiek. Dit sal miskien nie ’n wilde danspaartie raak nie, maar jy sal jouself geniet en jy sal werklik baie meer daar uit kry as wat jy sou kon dink. Bel gerus Steak ’n Ale en boek.

 

Klipdrift Battle of the Bands

Die naweek het ons ’n repetisie vir die Klipdrift Battle of the bands. Murg speel Dinsdagaand en ons het julle ondersteuning nodig. Ek meen dink net daaraan – ons is ‘n band van ou ballies (okei – Jacques is oud – ek is net soos goeie rooiwyn en die ander is almal youngsters) wat teen die jong generasie wil gaan deelneem in ‘n kompetisie om toerusting en ‘n platekontrak te wen. Ons het nie een van daai goed nodig nie, maar ons wil deelneem en goed doen en ons eie brand van musiek by gehore uitkry wat nie weet wie ons is of wat ons doen nie. Dit is net R 10-00 vir ‘n kaartjie en belowe om die grootste jol te wees waarvoor jy nie toegesluit kan word nie. Kyk by www.wimpie.co.za/klipdrift vir meer inligting

 

Sien julle almal daar!!!    

 

Tot kyk

 

-Gideon-

   

Ek is verlief

(0 votes)

Ek is verlief

 

Ek het haar een Sondagmiddag ontmoet op een van haar soel Lentedae. Ek het my groot geel tas agter my aangesleep na die toonbank wat sy domineer het. Die glimlag was een van opregte verwelkoming wat die uitputting van ‘n dag van lughawens en vlieg weggevee het en twintig jaar uit my murg gespoel het. Die “Bona Sera  Senor” het musiek gemaak in my ore en die pyn van inboek in haar hotel verlig. Haar gekartelde hare het beweeg sonder dat sy beweeg het. Dit was seker net ’n optiese illusie want wat beweeg terwyl dit nie beweeg word nie? Sy het my beskerm teen my ego se broosheid toe die stelsel nie die maatskappy se kredietkaart wou aanvaar waarmee en wou betaal nie. Dit was geen probleem nie, en nie ’n vernedering nie, net ’n telefoonoproep wat die tegniese probleem opgelos het.

 

Ek het haar gesien in haar vrolike Somersoggend toe sy met haar bromponie in die Piazza de Colosseum verbygerits het. Ek het by die Royal Café gesit en ’n yskoue Nastro Azzurro gebruik om my bestand te maak teen die hitte terwyl sy die Piazza besit het. Niemand het gedurf om haar kleim te betwis nie. Ek het haar weer gesien met ’n piekniekmandjie langs die Tiber waar sy ’n bottel Chiante met’n minnaar gedeel het.  Haar lag het weerklink van die Isola Teberina tot waar ek van die Ponto Palatino haar skoonheid probeer vaslê het

 

 Sy het verby my gestap in haar Herfs saam met haar vriendinne, en nog steeds die mans se koppe laat draai met haar magnetiese skoonheid. Sy het hulle ignoreer met die selfvertroue wat net skoonheid wat dieper le as die vel kan gee. Geen sweem van arrogansie nie, maar tog het haar heupe vertel van Boticelli en Bocelli. Die oomblik waar sy vasgenael gestaan het voor die beelde van haar Lente kon ek sien hoe inspirasie weerspieël word deur inspirasie. Hoe druk mens dit uit in woorde waar kuns nie eens reg kan laat geskied aan vervloë jeug nie?

 

Voor my vlug terug het ek haar sien dans tussen die kolomme van die Sint Petrus Plein, met haar arms wyd oopgegooi met die belewenis van haar eie Winter. Die wysheid van antieke geloof, die struktuur van beleë kultuur, die oorblyfsels van twee en ‘n half millenia kan haar nie keer om haarself te vernuwe en oor en oor haarself uit te vind nie. Die Madonna, die Kind, Romulus en Remus wat beskerm is deur die wolf.

 

Rome, ek is verlief.

 

 

 

 

 

 

 

   

Terug uit Rome

(0 votes)
Hoi Almal, Ek is terug. Ek is nie baie lewenslustig nie, en ook nie baie opgewek nie, maar ek is terug. Ek sal uiteraard meer vertel oor Rome en ook die terugreis, maar vir eers voel ek of daar 'n boom uit my een oogkas uitgroei, my ore uitgespuit is met soutsuur, iemand met 'n MX motorfiets donuts in my keel gemaak het en of King Kong my ribbekas liefkosend ingeduik het. Al troos wat ek het is dat dit heel moontlik nie die Meksikaanse griep is nie, omdat dit 'n twee dag inkubasietydperk het. In kort, ek het eergisteroggend opgestaan, 'n vinnige voetverkenning van die Vatikaan gaan doen, teruggetrein na die Hotel en 3-uur Saterdagmiddag met Emirates gevlieg na Doebai. Ek het elfuur die aand geland, en 10-uur gisteroggend gevlieg uit Doebai na Johannesburg om gistermiddag so 4:30 te land. Paspoortbeheer was vinnig, en bagasie ophaal was stadig, met al sportiewe interessantheid 'n antie met 'n groot "Agriculture" op haar rug wat 'n Beagle-hond gebring het om aan almal se privaatdele te kom ruik. Seker maar om uit te ruik wie lanbouvaardig besig was in die buiteland. Dit het ek alles reg gekry sonder 'n uur se slaap. Gisteraand by die huis het ek weer swaargekry oor iets wat ek geeet het, en dus net 'n paar uur slaap ingekry.  Ek is moeg, en wil slaap. Tot ek weer wakker genoeg is om te kan skryf!! -Gideon-
   

Page 12 of 18

Flash Mp3 Player

Ondersteun deur

Banner

Wie besoek ons...

We have 89 guests online

Ranking on ZA Topsites

ZA TOP Sites

Ranking on SA Top Blogs

saTopBlogs.co.za